仲有幾個月就正式失業

首先祝大家新年快樂，新一年，柳臣係度祝各位讀者心想事成，笑口常開。

隨便數數手指，柳臣發現自己已經讀咗二十幾年書。中學畢業之後，因為成績太差，走咗去讀兩年asso，然後又讀咗三年唔係好算u既u，亦因為咁雖然身邊好多同屆既中學同學上年已經畢咗業出黎做野，而柳臣都仲係一名在學廢青。
但是再過幾個月，恐怕柳臣就要由在學廢青轉職做失業廢青（如果有幸唔洗defer的話）。
事關作為一間廢u既中文系畢業生，新年既時候個個親戚都只會問你：「你讀中文係咪姐係做老師／作家啊？」
親，柳臣不厭其煩先係呢度一次過答大家，廢u既中文系出黎，主要係乞米。
自古以來，文人都係異類。讀商業既打算做商界，讀法律的打算做律師。讀中文係冇所謂既文界，因為係人都知道，係香港地文字係唔值錢。
你每日睇咁多字，有幾可俾過錢？如果你冇俾過，寫既人又何來有錢收呢？
所謂百無一用是書生，唔到你唔認。
不過，搵唔到工又冇咩好擔心既。反正，搵到一樣唔見得活得比較好。

我從來冇講過，但係其實小心輕看每月既開支，都係一筆講出黎你都唔信咁大既支出。去到無論我每個月搵幾多，都僅能夠填番上個月欠落既數。所以每一期佢能夠繼續發行，都係一個奇蹟，一個隨時會消失既奇蹟。
要維持呢個奇蹟，我地必須要改變現行既經營方式，包括改變發行模式。其實今期我地已經賣緊廣告，有訂閱實體刊既讀者就會知道。
至於其他未訂閱既讀者，遲啲都可以係唔同既社交平台見到我地既新計劃。到時大家一定要多多支持，我地需要更多更多既支持，先能夠繼續做落去。當然我地應承大家，我地一做，就唔止會繼續做，仲會不斷做得更好。

諗番細細個都真係幾好，以前唔洗出黎做野既時候，永遠唔會唔夠錢洗。五百蚊可以洗成個月，但到咗而家開始識自己搵錢，要自己去賺錢既時候，反而就搵幾千幾萬都好，反而永遠都唔夠錢洗。
可能以前自己冇能力賺錢，所以無論爸爸媽媽俾幾多，都要識得就住洗，度度計住計住。因為你知道，一洗曬就冇，要等到下個月先有錢。但係到近年自己開始搵錢，就會開始諗，錢反正會再賺，洗咗咪再搵囉。結果反而愈洗愈多，而且一開咗個頭，就會覺得「需要洗錢既地方」係無限咁多。
唔同細細個得幾舊水上限，個時如果因為玩online game想買張點數卡，柳臣就必需要係其他地方扣番個筆數，食少餐定係行路番屋企，你自己揀。
而家？你多咗個選擇叫：最多辛苦啲搵多幾舊水囉。變咗好多時只要係需要既野，你就會買，而唔係必要先買。

新年流流，只係想同大家傾吓謁，交代吓近況，所以冇咩特別主旨。
如果你拜年期間冇咩做，咁岩睇到呢篇文，歡迎留個言吹吓水，只要手機有電柳臣就會長on陪住大家過年。