日常分享 - 為何深夜不想睡 文字

大釘小日常於 09/10/2017 發表 收藏文章
為何深夜不想睡?
我相信每個人都會試過3~4點,甚至5~6點先瞓,原因有好多,可能係努力緊去完成某一樣嘢(趕Project,老細交代嘅工作要聽日返工前做好),可能係陶醉緊去進行某一樣嘢(打機,煲劇),又或者其實只係唔想呢一日就咁完。

以前都試過,明明已經完成晒手頭上嘅工作,但仍然唔想瞓。會試吓搵戲睇,試吓搵機打,盡管呢啲電影同遊戲都唔係大興趣到要去通宵。就算扚起心肝上咗張床到,都唔願意合埋對眼,仍然會拎住電話上吓Youtube,Facebook,高登連登等等。

所以我就喺到諗,為何深夜不想睡?

間唔中嘅凌晨,當我入房拎嘢嘅時候,都會望住瞓起上格床嘅細佬,然後喺度諗「點解佢會願意咁早瞓?」「點解我唔會願意咁早瞓?」但每次我都唔會得到答案。於是就會返出廳繼續搵啲嘢做吓,去到4~5點就上床瞓教,最後就係第二日嘅晏晝2~3點,又或者頂住眼瞓咁9點起身。其實每次起身嘅時候都會同自己講,今晚一定要早啲瞓,不過結果相信大家都知。

直至大學畢咗業,去完旅行返嚟,喺一個連續咗幾日都3點先起身嘅一個晏晝,我開始認真諗,為何深夜不想睡?

最後我就得出咗呢個答案—因為唔想呢一日就咁完,即使呢一日只係一個平平無奇,無咩特別事發生嘅一日。但正正因為咁,所以我唔想佢完。因為當我咁難得去捱過呢一日咁平淡嘅一日,如果我瞓咗,聽日就要再次經歷同尋日無差嘅一日,如此類推。這麼負面嘅嘢,歸根究底其實都係欠缺一個起身的意義。只要有一個聽朝起身嘅動力,期待聽日會發生咩事嘅心情,可能就會有早啲瞓嘅意欲。

人生話長唔長,話短唔短。預期繼續每晚喺度諗究竟有咩可以做,不如試吓諗聽朝起身有咩做。或者就會諗到一個起身的意義。

PS: 先向一啲多嘢做到連教都無得瞓嘅人道過歉
標籤: 日常  深夜  瞓教  大釘  

留言

會員
我要評論
請按此登錄後留言。未成為會員? 立即註冊